Алматыда маслихаттардың құрылуына 30 жыл толуына орай ғылыми-тәжірибелік конференция өтті.

Алматы қаласының әкімі Ерболат Досаев, сенат және Алматы маслихаты депутаттары, бұрынғы маслихат хатшылары, қоғамдық және саяси қайраткерлер шараға қатысты. Қала басшысы маслихаттардың соңғы үш онжылдықта рөлі айтарлықтай артқанын атап өтті.

2022 жылы мемлекет басшысының бастамасымен ең маңызды саяси реформалардың бірі жүзеге асырылды. Республикалық референдумның нәтижесінде Конституцияға енгізілген өзгерістер барлық билік тармақтарының, соның ішінде жергілікті өкілді органдардың қызметін жетілдіруге бағытталған нақты шараларды айқындады.

2023 жылы Алматы маслихатына сайлау алғаш рет жаңа ережелер бойынша өтті. Депутаттар корпусы 67%-ға жаңартылды және аралас принцип бойынша құрылды: 50% — партиялық тізімдер бойынша, 50% — өзін-өзі ұсынушылар.

"2022 жылдан бері Алматының барлық салаларындағы жүйелі дамуын анықтайтын 20-дан астам стратегиялық құжат қабылданды. Бұл қала аумағын абаттандыру ережелері, жасыл желектерді күтіп-ұстау және қорғау ережелері, 2030 жылға дейін Алматы қаласының бастапқы медициналық-санитарлық көмегінің бірегей стандарты, 2030 жылға дейін тұрғын үйді жаңғырту бағдарламасы, құрылыс ережелері, қалалық жоспарлау регламенті және басқа да құжаттар. Бұл маңызды бастамалар — тұрақты комиссияларда және маслихат депутаттық фракцияларымен бірлескен белсенді жұмыстың нәтижесі", — деді Ерболат Досаев.

Қала әкімі алдағы жылдарда Алматыны заманауи мегаполиске айналдыру және жайлы қалалық орта, жоғары қауіпсіздік деңгейі, әлемнің түкпір-түкпірінен инвестициялар мен таланттар үшін тартымдылығын арттыру бойынша маңызды міндет тұрғанын қосып өтті. Соңында Алматы әкімі депутаттарды құттықтап, оларға алғыс хаттарын табыс етті.