Астанада «Жулдызай» және «Аяулым» қаржылық пирамидаларына қатысты сот үкімі шықты.

«Инвестиция көлемі 1 миллион теңгеден басталып, уәде етілген пайда 40 күн ішінде 90%-дан асатын болды. Қосымша қатысушылар әр жаңа тартылған қатысушыдан салым сомасының 10%-ын алды. Нәтижесінде қаржылық пирамидаға 60 адам тартылды, жалпы шығын 490 миллион теңгеден асты. Осылайша, күдіктілердің бірі салымшылардың ақшасына елорданың элиталық тұрғын үй кешенінен 69,5 миллион теңгеге автотұрағы бар пәтер сатып алып, оны өз енесінің атына рәсімдеді. Сосын, алдын ала тергеу басталғанын білген соң, мүмкін болатын тәркілеуден жасыру үшін сатып алынған жылжымайтын мүлікті үшінші тұлғаға қайта рәсімдеді», — деп түсіндірді АФМ.

Тергеу барысында бұл мәміленің жалған екені дәлелденді, және сот санкциясымен жылжымайтын мүлікке тыйым салынды. Тергеу барысында күдіктілер зардап шеккендерге 72 миллион теңге көлемінде шығынды өтеді.

Соттың үкімімен қаржылық пирамиданы ұйымдастырушылар ҚР ҚК-нің 217-бабы 3-тармағы 2-тармақшасы бойынша, ал күдіктілердің бірі 218-баптың 1-тармағы «Құқыққа қарсы жолмен алынған ақша қаражатын заңдастыру» бойынша кінәлі деп танылып, 5 жылдан 7 жылға дейін бас бостандығынан айыру жазасы тағайындалды.

Құқыққа қарсы жолмен алынған қаражатқа сатып алынған пәтер мен автотұрақ зардап шеккендерге азаматтық талап-арыздар бойынша шығынды өтеу үшін тәркіленіп, берілді.