Иран мен Қазақстанның сауда министрлері екі ел арасындағы сауданы дамыту мәселелерін талқылады.

«Біз Иранмен тауар айналымын 3 миллиард доллар көлемінде арттыруда үлкен мүмкіндіктерді көреміз. Біз Иран нарығына 162 миллион доллар сомасында астық, күнбағыс майы, ет өнімдері және басқа да 60-тан астам тауар позицияларын ұсынуға дайынбыз», — деп атап өтті министр Арман Шаққалиев.

Ол Қазақстанның екі мемлекет басшылары қол жеткізген келісімдерді белсенді жүзеге асырып жатқанын баса айтты. Иран Қазақстанның Таяу Шығыстағы негізгі серіктестерінің бірі болып табылады.

2024 жылдың 11 айының қорытындысы бойынша Қазақстан мен Иран арасындағы тауар айналымы 296 миллион АҚШ долларын құрады, бұл өткен жылдың сәйкес кезеңімен салыстырғанда 8,1% -ға артық. Қазақстаннан Иранға экспорт та едәуір өсті, 29,1%-ға артты және 100,6 миллион АҚШ долларын құрады.

Қазақстаннан Иранға жеткізілетін негізгі тауарлар - арпа, бидай, рапс тұқымдары, жаңа немесе салқындатылған сиыр еті, күнбағыс майы, жүгері, қой еті, ешкі еті және сиыр еті.