Қазақстанда сұр сертификаттарды сататын 76 сайт бұғатталды.

«2024 жылы техникалық реттеу және метрология комитетінің (ТРМК) аумақтық департаменттері 8 183 бақылау шараларын өткізді, олардың ішінде 6 080 жағдайда (74%) бұзушылықтар анықталды. Нәтижесінде 401 миллион теңгеден астам сомаға 740 әкімшілік құқық бұзушылық туралы іс қозғалды. Сондай-ақ бақылау шаралары барысында аккредитация субъектілерінің 105 аттестаты тоқтатылып/қайтарылды, сондай-ақ сәйкестікті растау бойынша 11 мыңнан астам құжаттар жойылды», — деп хабарлады комитет.

Тексерулер барысында 160 өнім үлгісі сатып алынды, олардың 92%-ында бұзушылықтар анықталды. Шұғыл әрекет ету үшін 55 шара қолданылды.

Өлшеу құралдарын тексеру нәтижесінде 3 150 сертификат жойылды, сондай-ақ 13 595-ден астам өлшеу құралдарының қолданылуы тоқтатылды.

«Сонымен қатар, ҚР әртүрлі өңірлерінде стандарттарға сәйкес келмейтін өнімдердің сатылу жағдайлары тоқтатылды, оның ішінде кабельдер, цемент, электротехника және мотор майлары. Мәселен, Ақтөбеде қауіпсіздік стандарттарына сәйкес келмейтін кабель алынып, өнімді қайтару қажеттігі туралы хабарлама жіберілді», — деп толықтырды ұйым.

Сұр сертификаттарды сатуды жарнамалайтын интернет-ресурстарды блоктауға ерекше назар аударылды. Нәтижесінде аккредитациясыз сұр сертификаттарды заңсыз сатуды ұсынатын 76 сайт блокталды.