Энергетикалық жүйелерді интеграциялау туралы келісімге үш елдің президенттері қол қойды.
Мемлекетіміздің басшысы атап өткендей, бұл оқиға тұрақты даму жөніндегі ортақ ұмтылыстың жаңа парағын ашатын болады.
«Стратегиялық серіктестік туралы келісімнің қол қойылуы Орталық Азия мен Оңтүстік Кавказ аймақтарының дамуындағы үшжақты ынтымақтастықтың маңызды кезеңі. Бұл құжат біздің мемлекеттеріміздің энергетикалық жүйелерін интеграциялау, сондай-ақ экологиялық таза энергияны еуропалық және басқа нарықтарға жеткізудің сенімді коридорларын құру үшін жаңа мүмкіндіктер ашады. Қазақстан осы жерде ірі транзиттік аймақ ретінде ерекше маңызды рөл атқарады. Бұл Келісімнің практикалық нәтижелері біздің экономикаларымызды байланыстыратын «жасыл көпір» ретінде Орта коридордың дамуына да ықпал етеді. Осы маңызды салада тығыз ынтымақтастық үш мемлекет арасында тәжірибе мен озық технологияларды алмасуды белсендіреді, әрі біздің энергетикалық қауіпсіздігімізді одан әрі нығайтуға көмектеседі», — деп атап өтті президент.
Қасым-Жомарт Тоқаевтың айтуынша, көміртегі бейтараптығына ұмтылған Қазақстан үшін жасыл энергетика басым бағыт болып табылады.
«Біз қазба ресурстарына тәуелділікті азайту, технологиялық инновацияларды дамыту және экологиялық тұрақтылығымызды қамтамасыз ететін инфрақұрылымды құру бойынша белсенді жұмыс істеп жатырмыз. Қазақстанның шетелдік серіктестерімен бірлесіп жалпы қуаттылығы 43 ГВт болатын «жасыл» жобаларды жүзеге асыру бойынша келісімдерге қол жеткізілді», — деп баса айтты мемлекет басшысы.
Президент Ильхам Алиев бүгінгі келісім үш ел арасындағы бауырластық қатынастар мен стратегиялық серіктестікті жаңа деңгейге көтеретінін атап өтті.
«Орталық Азия мен Кавказ аймақтары көптеген мәселелер бойынша синхронды әрекет етеді, соның ішінде «жасыл» энергияны дамыту саласында. «Біз Өзбекстан мен Қазақстанда жаңартылатын энергия көздерін құру бойынша үлкен жоспарлар мен қол жеткізілген нәтижелер туралы білеміз», — деді Әзербайжан президенті.
Өз кезегінде Өзбекстан президенті бұл келісімнің тек экономикалық мақсатты көздемейтінін, сонымен бірге болашаққа ортақ үлес қосу болып табылатынын айтты.
«Бұл жобаның экологиялық маңыздылығын ерекше атап өткім келеді. Жеткізілетін энергия – жел мен күн энергиясы климатқа әсерді жұмсартуға мүмкіндік береді. Осылайша, біз Париж келісімі шеңберінде климатты қорғау жөніндегі бірлескен күш-жігерді қолдаймыз және тұрақты даму мақсаттарына жетуге жәрдемдесеміз», — деп атап өтті Шавкат Мирзиеев.
Бұдан басқа, мемлекет басшыларының қатысуымен Қазақстанның энергетика министрі Алмасадам Саткалиев, Әзербайжанның энергетика министрі Парвиз Шахбазов, Өзбекстанның энергетика министрі Журабек Мирзамахмудов және Сауд Арабиясының энергетика министрі Абдель Азиз бен Салман Аль Сауд жасыл энергияны дамыту мен жеткізу саласындағы ынтымақтастық жөніндегі Атқару бағдарламасына қол қойды.