«Астана» футбол клубының коррупциялық талдауының нәтижелері жарияланды.

«Жыл сайын клубтарды қолдауға миллиардтаған қаражат бөлінеді, алайда оның едәуір бөлігі агенттік қызметтерді төлеуге, шетелдік ойыншылардың жоғары жалақыларына, оқу-жаттығу жиындарына және футбол алаңдарын жалдауға жұмсалады. Тек соңғы 6 жылда (2018-2023 жылдар) футбол клубтарына бюджеттен 200 миллиардтан астам теңге бөлінген. Талдау барысында ең қымбат футбол клубы - ФК «Астана» шығындары зерттелді, оған 6 жылда ФК «Астана» қаражатының 66%-ы, яғни 33,1 миллиард теңге, еңбек ақыға жұмсалған. Осы орайда жалақы көлемі футбол клубының басшылығы мен ойыншылардың қалауы бойынша белгіленген», — деді Бигайдаров.

Оның айтуынша, агенттік төлемдер бойынша да елеулі қауіптер анықталған — тек ФК «Астана» соңғы 5 жылда футболшыларды тарту үшін делдалдарға 4,5 миллиард теңге төлеген.

Сондай-ақ, шетелде оқу-жаттығу жиындарына едәуір қаражат жұмсалған — 2018 жылдан бері футбол клубтары осындай жиындарға 6,4 миллиард теңге жұмсаған. Мысал ретінде ФК «Астана» осы мақсаттарға 1 миллиард теңгеге жуық қаражат жұмсап, Түркия мен Дубайға жиындарға барғаны айтылды.

«Мұндай кәсіпқой клубтардың саясаты спорттық инфрақұрылымды дамытуға арналған ресурстарды шектеді. Ең қымбат футбол клубы «Астана» өзіндік академиясы мен футбол алаңы жоқ. Нәтижесінде клуб 6 жыл ішінде футбол алаңдарын жалдауға шамамен 1,4 миллиард теңге жұмсаған. Кейбір клубтар миллиондаған сыйақыларды төлеуге мәжбүр болды», — деп хабарлады брифингте.

Сондай-ақ, талдау нәтижелері миллиардтаған бюджет қаражатының өзіндік инфрақұрылым құруға емес, өнімсіз легионерлерді ұстап тұруға, шетелдік жиындарға, артық төлемдерге, қымбат агенттік және басқа да қызметтерді сатып алуға жұмсалғанын көрсетті.

«Сыртқы талдау нәтижелері бойынша Минтуризм және спортқа жемқорлық тәуекелдерін жою бойынша ұсыныстар енгізілді. Профессионал спорт клубтарындағы легионерлердің үлесін азайту және қаражатты бұқаралық спортқа бағыттау, жоғары жетістіктер спортының қаржыландыруын орталықтандыру, спорт саласындағы тұлғалар туралы толық деректерді қамтитын ұлттық цифрлық платформа Е-sport енгізу шараларын қабылдау ұсынылды», — деп атап өтті Бигайдаров.

Бұған дейін мәжілісте спорт мәселелері бойынша заң жобасы бірінші оқылымда мақұлданғаны хабарланған болатын, оған сәйкес заңнамалық деңгейде легионерлерді бюджет қаражатынан, соның ішінде квазимемлекеттік сектор қаражатынан қаржыландыруға тыйым салу жоспарлануда.