Антикор спорт саласында бюджет қаражатын жымқыру белгілерін анықтады.

«Агенттік туризм және спорт министрлігімен бірлесіп спортты қаржыландыру саласындағы сыбайлас жемқорлық тәуекелдерін сыртқы талдау жүргізді. Талдау министрліктің орталық деңгейінде, облыстардың спорт және дене шынықтыру басқармаларында өңірлік деңгейде жүргізілді. Талдау барысында мемлекеттік қаражаттың тиімсіз және ұтымсыз жұмсалуына ықпал ететін ауыр сыбайлас жемқорлық тәуекелдері анықталды. 16 өңірде еңбек ақы қоры, іссапар шығындары, жалған спорттық шараларға қатысты бюджет қаражатын жымқыру белгілері бар фактілер анықталды», — деді Бигайдаров.

Ол 17 өңірде жалған дипломдарды пайдаланудың 260-тан астам фактісі анықталғанын, 5 өңірде спорт объектілерін басқаруда тиімділіктің төмендеуіне байланысты тәуекелдер бар екенін, барлық материалдар полиция органдарына тапсырылғанын, 188 тұлғаның еңбек шарттарының бұзылғанын қосымша атап өтті.

Мысал ретінде Атырау облысында 2018 жылы негізсіз «Байбарыс-Атырау» хоккей клубының жеке кәсіпкеріне берілген «Мұз сарайы» спорт объектісінің коммуналдық меншікке қайтарылғанын келтірді.

«Сол сияқты, Алматыда «Халық Арена» және «Алматы Арена» нысандары коммуналдық меншікке қайтарылды, бұған дейін жеке ұйымның басқаруында болған. Батыс Қазақстан облысында мемлекеттік меншікке футбол алаңы бар стадион қайтарылды, ол жеке ұйымның сенімгерлік басқаруында болды. Шымкент қаласында 7 жыл бұрын 128 миллион теңгеге сатылған «Мұз сарайы» спорт кешенінің үлесі мемлекет меншігіне қайтарылды», — деп атап өтті Бигайдаров.